მართალი გითხრათ, ზედიზედ რვა კვირის განმავლობაში წვიმდა. მსგავსი რამე აქამდე გაგონებითაც კი არავის გაეგონა.

ატრაქციონების პარკი ყვავილივით დაჭკნა, გაიცრიცა, მოყანყალდა, ხასხასა ფერები გადაუვიდა, დაჟანგდა და, რადგან ქვიშაზე იყო აგებული, ნელ-ნელა ყველაფერმა დაშლა დაიწყო.

- ძია, ჩვენ ერთი საიდუმლო გვაქვს.

ჰემულს იმდენად არ უყვარდა სხვისი საიდუმლოებების მოსმენა, რომ სახეზე შიში აღებეჭდა, მაგრამ ჰომზამ სხაპასხუპით მიაყარა:

- ჩვენ თითქმის ყველაფერი გადავარჩინეთ და ახლა ფილიფიონკას ფარდულშია. იცით რამდენი ვიშრომეთ? ღამღამობით შინიდან ვიპარებოდით, წყლიდან ამოგვქონდა ყველაფერი, ხეებიდან ვხსნიდით, ვამშრალებდით, ვაპრიალებდით და რაც შეიძლება ლამაზად ვალაგებდით!

- რას ალაგებდით?

- ატრაქციონებს! ყველაფერი, რაც გადარჩა და ვიპოვეთ, შენახული გვაქვს! ხომ კარგი ვქენით?! იქნებ ჰემულებმა პარკი თავიდან ააწყონ და თქვენ ისევ შეგეძლებათ ბილეთების ხვრეტა.