ორთქმავალი თვალს არ მიჰფარებოდა, რომ ჩვენს მოგზაურებს უცნაური ხმა შემოესმათ - ჭრაჭ-ჭრაჭ! ჭრაჭ-ჭრაჭ!  თან თავს რაღაც ვეება ჩრდილი წამოადგა.

შესაზარი კი არაფერი მომხდარა. თურმე ნუ იტყვით, ფოსტალიონი წამოსდგომოდათ, ამ ფოსტალიონს ჭრაჭუნა ფეხსაცმელებს, ანუ, უფრო მოკლედ, ჭრაჭუს ეძახდნენ და იმოდენა ფოსტალიონი მეორე არ იყო დედამიწის ზურგზე. ვისაც კი მოულოდნელად წაადგებოდა, ყველა გულგახეთქილი ყვიროდა: „მიშველეთ! გოლიათი!“