ოლივერ ტვისტი (ნაწყვეტი #10)
ფეიგენი ქვის სკამზე იჯდა, თავზე დოლბანდი ჰქონდა შემოხვეული - დატყვევების დროს დაჭრილიყო.
-ფეიგენ, შენს სანახავად მოვიდნენ, რამდენიმე კითხვა აქვთ,- დაუყვირა ზედამხედველმა.
მოხუცმა მნახველებს მოჰკრა თუ არა თვალი, კუთხეში მიიკუნჭა და ამოიკნავლა:
- რა გინდათ ჩემგან?
- შენ გაქვს წერილი, რომელიც მონკსმა მოგაბარა,- უთხრა ბრაუნლოუმ.
- ტყუილია! - უარზე დადგა ფეიგენი.
- აზრი აღარ აქვს თამაშს,- უთხრა ბრაუნლოუმ,- მონკსმა ყველაფერი აღიარა...
- მომიახლოვდი, ოლივერ, - ხმადაბლა თქვა ფეიგენმა,- მინდა, რაღაც გითხრა ყურში.
ოლივერმა უხალისოდ უშვა ხელი ბრაუნლოუს და ფეიგენს მიუახლოვდა.
- წერილი ტომსიკაში დევს და ჩემი სახლის საკვამურში, ერთ ღრიჭოში, ინახება,- უთხრა ოლივერს.
ფეიგენი არ გაჩუმდა, ისევ ჩურჩულებდა:
- ხომ დაგეხმარე, ოლივერ, ახლა შენც მიშველე - წამიყვანე აქედან!
ოლივერმა ფეიგენს ყურადღებით შეხედა. ეს იყო კაცი, რომელმაც საშინელი ტანჯვა მიაყენა, მაგრამ, მიუხედავად ამისა, მაინც ძალიან შეებრალა მოხუცი.
- ღმერთმა გაპატიოს! - უთხრა სევდიანად.