ახლა გიამბობთ, რა მოხდა სასახლეში, როცა მეფე მათიუშის დაკარგვის ამბავი შეიტყვეს.

დილით მეფის საძინებელ დარბაზში მსახურთუხუცესი რომ შევიდა, თვალებს არ დაუჯერა: ფანჯარა გაფრიალებული იყო, ლოგინი - აწეწილ-დაწეწილი, მათიუში კი არსად ჩანდა.

ჭკვიანი კაცი იყო მეფის მსახური, საძინებელი დარბაზის კარი მაშინვე გასაღებით დაკეტა, გავარდა ცერემონმაისტერთან, გააღვიძა და ყურში ჩასჩურჩულა:

- ბატონო ცერემონმაისტერო, მეფე დაიკარგა.

ცერემონმაისტერმა ტელეფონით დაურეკა უფროს მინისტრს და სრულიად საიდუმლოდ აცნობა ეს ამბავი. ათი წუთიც არ გასულა, რომ სამი მანქანა მოგრიალდა:

უფროსი მინისტრის, შინაგან საქმეთა მინისტრსა და პოლიციის პრეფექტის.

- მეფე მოიტაცეს.

ცხადია, რომ მოიტაცეს, მეფის მოტაცება კი მხოლოდ მტერს სჭირდება. იმისთვის სჭირდება, რომ ჯარი გაიგებს, მეფე დაიკარგაო, თითსაც არ გაანძრევს, და მტერიც უბრძოლველად ჩაიგდებს ხელში დედაქალაქს.

- ბევრმა იცის, რომ მეფე დაიკარგა?

- არავინ  იცის.

- კიდევ კარგი!

- ახლა ის უნდა გამოვარკვიოთ, მათიუში ცოცხალი წაიყვანეს, თუ აქვე მოკლეს. ბატონო პოლიციის პრეფექტო, გამოიკვლიეთ ყველაფერი... ერთი საათის შემდეგ პასუხი მომახსენეთ.